A Asociación de Empresarios e Empresarias de Verín (AEVER) participou na xornada “Encontros con Asociacións”, organizada pola Confederación Empresarial de Ourense (CEO), un espazo concibido para fomentar o diálogo, a colaboración e a conexión entre o tecido empresarial da provincia.
O encontro reuniu a representantes de distintas asociacións empresariais de Ourense, entre elas Verín, O Carballiño, Celanova e PROLIMIA, quen compartiron a súa visión sobre a situación actual das súas respectivas comarcas. Durante a sesión abordáronse os principais retos aos que se enfrontan as empresas, así como os proxectos en marcha e as oportunidades de desenvolvemento existentes en cada territorio.
AEVER tivo a oportunidade de trasladar de primeira man a realidade do tecido empresarial de Verín, poñendo en valor o traballo que se vén realizando desde a asociación e destacando a importancia de seguir impulsando iniciativas que favorezan o crecemento económico e a competitividade das empresas locais.
A xornada incluíu tamén a mesa redonda titulada “O pulso empresarial de Ourense”, na que se debateron cuestións clave como a dixitalización, a formación, o acceso a axudas e a necesidade de reforzar o networking e a cooperación entre empresas e asociacións.
Así mesmo, as entidades participantes recibiron un recoñecemento polo seu labor no territorio, un xesto que reforza o compromiso conxunto por dinamizar a actividade empresarial na provincia. Ademais, no marco desta xornada, fíxose un recoñecemento especial á empresa Electricidad Iglesias polo seu compromiso coa innovación, a súa capacidade de adaptación e o seu espírito pioneiro.
O encontro concluíu cun espazo de networking que permitiu o intercambio de ideas, contactos e posibles liñas de colaboración futura, consolidando esta iniciativa como un paso importante para fortalecer o ecosistema empresarial ourensán.
