Un ano máis CCU AEVER participou na programación do nadal de Verín colaborando xunto con outras entidades en actividades de dinamización do comercio, dirixidas a público adulto e aos protagonistas destas festas: os nenos e nenas.
A pista de patinaxe sobre xeo sintético, tras o éxito acadado en 2015, foi a atracción máis esperada, e na súa segunda edición consolidouse como un atractivo do nadal en Verín, recibindo máis de 3200 visitas. Igual que o ano pasado, os establecementos asociados a CCU AEVER regalaron aos seus clientes descontos de 2€ para acceder á pista instalada na praza García Barbón. Tamén se repartiron nos comercios os boletos para o sorteo de 1000€ que premia as compras na vila.
A Gala Máxica culminou a programación de nadal coa actuación dos magos Magomimo Anyo e Mago Xacobe, a entrega de premios do concurso de escaparates organizado pola Cámara de Comercio, e o sorteo do cheque de 1000€. Foi unha gala moi especial e divertida, na que os máis pequenos participaron e riron coas bromas dos magos, que ademáis compartiron algúns trucos secretos que de seguro animarán as ceas de reis. Música, maxia, mimo, e ilusión que se manterán durante toda a semana grazas á visita dos Reis Magos.
