Dende CCU AEVER Verín, vimos de poñer en marcha unha campaña de sensibilización cara o comercio local. Unha campaña que quere conseguir que a poboación tome conciencia de que cando escollen mercar no comercio local, axudan directamente aos seus veciños e veciñas, con nomes e apelidos. Precisamente eles e elas son os protagonistas da campaña.
A mensaxe principal da campaña é a frase “Eu son comercio local”, nun primeiro momento en boca dos comerciantes para logo ir involucrando á poboación en xeral.
A primeira fase da campaña consiste en difundir a través da web e das redes sociais da asociación as fotografías dos asociados e asociadas que participan. Trátase dunha serie de retratos que buscan provocar emocións na persoa que observa, pola proximidade, a familiaridade, porque detrás de esas caras, algunhas aínda novas, e outras cunha longa traxectoria, agóchanse proxectos vitais vinculados a Verín, e sobre todo moita ilusión por continuar cos seus negocios.
Nunha segunda fase, a través de cartelería e publicidade impresa na rúa e nas tendas, coas caras dos comerciantes e a mensaxe da campaña, buscarase a complicidade e a implicación dos clientes e clientas, que serán invitados a facer a súa foto expresando que tamén son comercio local e a explicar os motivos polos que se identifican con esta frase.
Igual que sucedeu con campañas anteriores, espérase que os clientes se impliquen e identifiquen a mensaxe co comercio da vila e coa actividade da asociación, consolidando a longo prazo a frase “Eu son comercio local” como un valor en favor da economía da vila.
