Volve a nosa cita anual, a Gala de Nadal de AEVER CCU Verín, desta volta cunha proposta familiar chea de humor, música e circo da man de Fran Rei e Félix Rodríguez, que traerán á vila o espectáculo Saaabor de Nadal!, acompañados polas actuacións de Paco Nogueiras e Zirko Txosko.
Cando será a gala? E onde?
No Pavillón Deportivo de Verín o próximo 4 de xaneiro de 2026 ás 18:00
Como podo conseguir entradas para a Gala?
A entrada será de balde, podes conseguila nos establecementos asociados a AEVER CCU Verín, porque queremos recordarche que cando mercas en Verín, estás contribuíndo á dinamización da vila.
A partir do día 24 poderás conseguir as entradas nos teus establecementos favoritos, os do comercio local de Verín.
Como será a gala?
Nesta edición, a Gala estará protagonizada por Fran Rei e Félix Rodríguez, que traerán á vila o espectáculo Saaabor de Nadal! da man de Culturactiva Producións. Dirixida por Avelino González e coa escenografía de Kukas, a peza combina música, maxia, humor, ritmo e participación do público, ofrecendo un “menú do día” tan saboroso como sorprendente. Os dous intérpretes dan vida a dous recoñecidos cociñeiros que elaboran unha proposta escénica chea de xogos, imaxinación e referencias á gastronomía propia destas datas, pero tamén a mensaxes vinculadas ao consumo responsable, á alimentación saudable e á importancia de apoiar o comercio da contorna. No seu repertorio conviven desde villancicos populares ata a célebre Marcha Radetzky, sempre filtrados polo espírito festivo e cómico que caracteriza aos artistas.
A tarde completarase con actuacións que reforzan o carácter familiar e diverso da Gala.
Paco Nogueiras é pura dinamita escénica para público familiar. Coa enerxía dun directo que non dá respiro e un humor que conecta de inmediato con cativos e adultos, Nogueiras transforma cada actuación nun pequeno festival. Os seus espectáculos —Brinca Vai!, Radio Bulebule ou Extra!— recorreron Galicia enteira e valéronlle dous Premios Martín Códax da Música, consolidándoo como unha das voces máis recoñecidas e queridas da música infantil galega. Cantante, actor e narrador a partes iguais, é capaz de mover a todo un pavillón entre xogos, coreografías e historias cantadas
Xunto a el, Zirko Txosko levará ao pavillón un número de circo contemporáneo cargado de técnica, humor e frescura. A compañía formada por Ariñe Azkue e Óscar Páez chega a Verín tras anos de formación e traballo en escolas e compañías de España, Italia e Arxentina. Acrobacias, equilibrios e técnicas aéreas conviven cun risco totalmente real que mantén ao público en tensión e gargalladas a partes iguais. A proposta mestura teatro, comicidade e participación do público, convertendo cada número nun xogo no que a sorpresa é constante.
Ademais, a Gala contará cunha vertente solidaria grazas á presenza do colectivos Miquiños que instalarán os seus stands informativos no Pavillón Deportivo. A través deste espazo, a asociación dará a coñecer o seu labor social e de protección animal entre a cativada asistente, co obxectivo de sensibilizar e implicar ao pú ao tempo que recadarán fondos para continuar desenvolvendo os seus proxectos, convidando ao público asistente a colaborar e implicarse nunha causa solidaria que forma parte activa do tecido asociativo da vila.
Con esta programación, reafirmamos o noso compromiso coa dinamización comercial e cultural de Verín.
Esta campaña lévase a cabo gracias á confinanciación da Xunta de Galicia e á colaboración do Concello de Verín.
