A Asociación de Empresarios de Verín colaborará na promoción da Revolta Irmandiña, unha carreira de obstáculos que se celebrará no municipio o 14 de xuño, co obxectivo de fomentar a práctica deportiva e a participación cidadá nunha actividade lúdica e saudable.
Campaña de apoio ao comercio local
Como parte desta colaboración, a asociación porá en marcha unha acción promocional destinada a apoiar o evento deportivo e, ao mesmo tempo, impulsar o consumo no comercio de proximidade. A campaña desenvolverase do 11 ao 24 de maio, período no que as persoas que realicen compras nos establecementos asociados poderán participar no sorteo de tres dorsais para tomar parte na proba.
O sorteo celebrarase o 25 de maio nas instalacións da Asociación de Empresarios de Verín.
Esta iniciativa busca incentivar as compras no comercio local, vinculando a participación nunha actividade deportiva co apoio aos negocios da vila. Deste xeito, preténdese dinamizar a actividade comercial e reforzar o papel do comercio de proximidade como parte activa da vida social e deportiva do municipio.
