Amañece en Verín e comeza a representación.
O escenario está composto por centos de escaparates que mostran unha vila moribunda. A pesar de que é un xoves normal, de compras, xestións, recados e traballo, algo cambiou.
Os actores, unhas trescentas persoas que hoxe representan o papel máis triste da súa traxectoria profesional: o día que morreu a vila.
A representación sucede durante todo o día, o público murmura inquedo durante toda a xornada, e será coa chegada da noite cando a trama chega ao seu punto álxido, cando os comercios apagan as súas luces, e descúlpanse ante os seus clientes, despiden aos traballadores e traballadoras e marchan, mornos, ansiosos por un futuro incerto.
Por sorte, só foi unha representación, un simulacro do que sería a vila sen comercio, unha campaña máis a favor do comercio local, se cabe esta foi a máis dura dos últimos anos.
Dende fai uns meses víñase xestando nas reunións de AEVER a necesidade de mostrar unha realidade que podería non ser moi lonxana, de non cambiar os hábitos de consumo cara a outros máis responsables cara ao comercio local. Foi este 8 de novembro cando de maneira simultánea con asociacións doutras poboacións, decidiuse levar a cabo o peche simulado do comercio.
Jose Ángel Rodicio, xerente de CCU AEVER Verín, explicaba aos asociados que o obxectivo é “mover conciencias e facer reflexionar ó pobo de Verín que deu un exemplo de unidade, involucrándose dende o principio para levar a cabo exitosamente a campaña.” Ademais agradecía a implicación de outros moitos establecementos non vinculados á asociación como franquicias, supermercados, bancos, ou mesmo unha coñecida notaría da vila. Todo un exemplo de solidariedade e implicación para representar os catastróficos efectos da morte do comercio local.
O sector hostaleiro, tamén quixo colaborar coa campaña,aproveitando que se realiza o mesmo día que o coñecido “pinchoxoves”, colocando mensaxes en sinal de solidariedade co comercio e para facer reflexionar sobre os efectos colaterais do posible peche que tamén lles afectaría.
O Concello de Verín involucrouse na campaña apagando as luces dos edificios públicos ao mesmo tempo que o simulado peche dos establecementos, e diminuíndo a intensidade das luminarias.
Sen embargo esta campaña non quixo renunciar á mensaxe positiva, pois o comercio local tamén representa para moitas persoas a identidade dunha vila recoñecida por contar con comercio de calidade, atendido por xente amable e con moitas ganas de superar esta incerta fase.
Mensaxes como “Gracias a ti o pequeno comercio é máis grande”, “Ti fas posible o comercio local” ou “Xuntos conseguimos que o pobo teña vida”, animan á veciñanza a continuar sendo parte do tecido empresarial da vila e apostar por ela.
CCU AEVER Verín ten levado a cabo diferentes campañas de concienciación cara ao comercio local, poñendo en valor fundamentalmente ás persoas que o forman, e animando á cidadanía en xeral a comprometerse e facer un consumo responsable. O enfoque transversal e aberto das campañas, e un intenso traballo en rede con outras entidades públicas e privadas fixo que esta campaña fora apoiada por moitas persoas socias e non socias de AEVER, e este pode ser o factor que garanta o éxito deste tipo de accións de cara ao futuro.
